1991-ci ilin iyun ayından fəaliyyətə başlamış Azərbaycan İctimai-Siyasi Universiteti (əvvəlki adı Ali İctimai-Siyasi Kollec) Azərbaycan Respublikası Nazirlər Kabinetinin 11 oktyabr 1997-ci il tarixli 204C saylı sərəncamı ilə dövlət qeydiyyatından keçərək özəl ali məktəb statusu almışdır.

Azərbaycan İctimai-Siyasi Universiteti özünün elmi-pedaqoji potensialına görə respublikamızın ən qabaqcıl ali məktəblərindən biridir. Burada Azərbaycan Elmlər Akademiyasının 12 həqiqi və müxbir üzvü, 42 elmlər doktoru, professor, 45 elmlər namizədi, dosent çalışır. Təhsil Azərbaycan və rus dillərində aparılır. Universitetdə bakalavr pilləsində yüksək ixtisaslı kadrlar hazırlanır. Təhsil müddəti əyani şö'bədə 4, qiyabi şö'bədə 5 ildir. Tələbələr təhsil aldığı müddətdə hərbi xidmətdən azad olunur. Şəhid, köçkün, müharibə dəhşətlərinə mə'ruz qalan və imkansız ailələrdən olan tələbələrə təhsil xərcinin ödənilməsində güzəştlər edilir. Dərs əlaçıları son kurslarda xarici ölkələrə göndərilir.

Universitetdə 10 kafedra (hüquq fənləri, təbiət fənləri, iqtisad fənləri, xarici dillər, Azərbaycan dili və ədəbiyyatı, beynəlxalq münasibətlər, fəlsəfə və sosial-siyasi fənlər, şərq dilləri və ədəbiyyatı, hərbi-tibbi hazırlıq) fəaliyyət göstərir, müasir səviyyədə təchiz edilmiş linqafon və kompüter kabinələri, kitabxana, idman və konfrans zalı, bufet-yeməkxana tələbələrin xildmətindədir. Universitetin kafedraları respublikanın ali məktəbləri, habelə Rusiya, Ukrayna, Gürcüstan, Türkiyə, İran və digər ölkələrin uyğun ali məktəbləri ilə kadr hazırlığı sahəsində əməkdaşlıq edir, alimləri respublika və beynəlxalq elmi konfranslarda və simpoziumlarda fəal iştirak edir. 1998-ci ildə Azərbaycan İctimai-Siyasi Universitetində (o dövrdə Ali İctimai-Siyasi Kollec adlanırdı) iki respublika səviyyəli elmi-nəzəri konfrans keçirilmişdir. Ali təhsilli mütəxəssislər müsahibə yolu ilə Universitetin hüquqşünaslıq ixtisası üzrə qiyabi şö'bəsinin III kursuna qəbul edilirlər.